-Өөдрөг үзэлтэй бизнесмен-

    Олон улсын хөрөнгө оруулагчдын дунд домог мэт яригдах, уул уурхайн жуниор компанийг бүтээгч Роберт Фрийдланд “Уул уурхайн 7 хоног” нэгдсэн арга хэмжээний онцлох зочин илтгэгчээр оролцож байна. Дэлхийд зэсийн аварга том ордуудыг олж ирүүлсэн Фрийдланд монголчуудын хувьд эчнээ танил. Түүний тухайд гэвэл Монголын өмнийн говиос Оюутолгой хэмээх зэс, алтны үлэмж баялаг нөөцтэй ордыг нээж, өнөөдөр тэрхүү орд улсын эдийн засгийг тэтгэж, хөрөнгө оруулалтыг усалж байгаа.

Асар их зардал, хөрөнгө оруулалтаар бүтсэн Оюутолгойн гүний уурхайн бүтээн байгуулалт ард үлдэж, үйлдвэрлэлд өдгөө шилжсэн. 

Хөрөнгө оруулалтын гэрээг үзэглэсэн цагаас хойш Монголыг тойрч ниссээр байсан Канадын бизнесмен Улаанбаатар ирсэн нь, ирээд “Mining Week” чуулганы хойморт илтгэл тавихаар болсон нь ихээхэн анхаарал татна.

Хоёр дахь намраа зохион байгуулагдаж байгаа уул уурхайн нэгдсэн арга хэмжээний ярианы сэдэв, анхаарлын төвд Роберт Фрийдланд байх нь дамжиггүй. Тэр Монголын эдийн засаг хоёр оронтой тоогоор өсөхөд /2011 онд 17.3 хувьд хүрч, дэлхийд хамгийн өндөр өсөлттэй орны нэг болж байсан/ түүхэн чухал үүрэг гүйцэтгэсэн хүмүүсийн нэг мөн. 1993 онд 746.3 сая ам.доллар байсан дотоодын нийт бүтээгдэхүүн өнөөдөр 17.1 тэрбум ам.долларт хүрч, 23 дахин өсөхөд түлхэц болсон нөлөөлөгч ч бас мөн. 

Оюутолгой ордыг нээснээр түүний нэр олон улсад, тэр тусмаа хөрөнгө оруулагчдын дунд мандаад зогсохгүй бэл бэлчин нь тэр хэрээр зузаарсан “аатай эр”.

Өмнөх цаг үе рүү нүүе. Дэлхийн уул уурхайн гигант “Би Эйч Пи” Монголын салбараа хаах шийдвэр гаргасан ч “Оюутолгой” төслийг хаялгүй хамтарч ажиллах компанийн эрэлд гарлаа. Энэ бол 1998 он. Англо-Американ, дараа нь Австралийн Вестерн майнинг корпораци. Гэвч тэд нэлээд сонирхсон ч Оюутолгойгоос эрдэнэс олно гэж итгэсэнгүй. Энэ бүхний дараа “Айвенхоу Майнз” компанийн геологич Дуглас Кёрвин “Оюу толгой”-д ирсэн нь шинэ түүхийн эхлэл болов.  Их хэмжээний санхүүгийн алдагдалд орсон “Би Эйч Пи”-гээс “Айвенхоу Майнз” Оюутолгойн лицензийг худалдан авчээ.  

“Айвенхоу Майнз” 2000 оны тавдугаар сараас эхлэн  хайгуулын өрөмдлөг хийж, дорвитой үр дүн бас л гарсангүй. Айвенхоу цааш ажиллах төсөвгүй болж, мөн л хамтарч ажиллах партнёр хайж эхэлсэн бөгөөд төслийг хаах шийдвэр дээр Роберт Фрийдландын доод талын бүх дарга нар гарын үсэг зурчихсан, тэр л ганцаараа зурах үлдээд байсан гэдэг. Яг тэр үед үлдсэн мөнгөөрөө 3 газарт алмазан өрөмдлөг хийхээр болж, хариу нь өнөөдрийн “Оюутолгой”-г дэлхийд зарласан юм. 

Роберт Фрийдланд “Энэ бол Дэлхийн алт, зэсийн шинэ нутаг. Энэ бол энгийн нэгэн уурхай биш, энгийн нэгэн ашигт малтмал агуулсан талбай ч биш. Энэ бол алт, зэсийн муж” хэмээн Оюутолгойн тухай ярьсан байдаг. Өнөөдөр "Айвенхоу Майнз" цэвэр эрчим хүчний төслүүдэд хүч сорьж, бизнесийн цар хүрээгээ улам тэлсээр байна.