Ашигт малтмалын салбарт үйл ажиллагаа эрхлэгчдэд хөрөнгө оруулалт дутагдалтай байдаг. Тиймээс үйл ажиллагааг нь дэмжих зорилгоор тус салбарт үйл ажиллагаа явуулж байгаа болон явуулахаар төлөвлөж байгаа хөрөнгө оруулалт шаардлагатай геологи, уул уурхайн төслийн мэдээллийг гадаад, дотоодын хөрөнгө оруулагчдад зориулан Ашигт малтмал, газрын тосны газраас эмхэтгэл хэлбэрээр боловсруулан гаргажээ.
Ашигт малтмал, газрын тосны газрын Кадастрын бүртгэлийн системд 2024 оны жилийн эцсийн байдлаар 1216 аж ахуйн нэгжийн 1759 ашигт малтмалын ашиглалтын тусгай зөвшөөрөл бүртгэлтэй байсан. Эдгээрээс 698 аж ахуйн нэгжийн 956 ашиглалтын тусгай зөвшөөрлийн талбайд үйл ажиллагаа явуулаагүй тухай мэдээг тусгай зөвшөөрөл эзэмшигчдээс Ашигт малтмалын газрын Уул уурхайн хэлтэст ирүүлжээ.
Үйл ажиллагаа явуулаагүй шалтгаануудаас үзэхэд 425 аж ахуйн нэгж 538 ашиглалтын тусгай зөвшөөрлийн талбайд хөрөнгө оруулалтгүйн улмаас ашиглалт явуулж чадаагүй байна. Үүнээс хөрөнгө оруулалт шаардлагатай талаар 49 аж ахуйн нэгж 54 төслийн мэдээллийг Ашигт малтмал, газрын тосны газарт ирүүлжээ. Энэхүү төслүүдэд нийт 4.1 их наяд төгрөгийн хөрөнгө оруулалт шаардлагатай байна.
Эдгээр төслүүдээс хайгуулын ажил хийж, нөөц тогтоох, нөөцийн хэмжээг нэмэгдүүлэх сонирхолтой 10, ашиглалтын үйл ажиллагаа явуулж ордыг эдийн засгийн эргэлтэд оруулах зорилготой 40, баяжуулалт, боловсруулах үйлдвэр байгуулж нэмүү өртөг шингэсэн бүтээгдэхүүн үйлдвэрлэх 4 төсөл байна.
Ашигт малтмалын төрлөөр нь авч үзвэл алтны 23, шохойн чулууны 8, нүүрсний 4, хайлуур жоншны 3, газрын ховор элемент, зэс, төмөр, гөлтгөнийн тус бүр 2, бал чулуу, битум, гантиг, гянтболд, литий, манган, цайр, цахиурын тус бүр 1 төсөл хөрөнгө оруулалт хайж байна.
