Богино хугацаанд нүүрсний экспортыг эрчимжүүлэх, валютын нөөцийг нэмэгдүүлэх үүрэг бүхий Ажлын хэсэг Ханги, Гашуунсухайт, Шивээхүрэн боомт болон Нарийнсухайтын уурхайд ажиллаж, нөхцөл байдалтай нь танилцлаа. Ажлын хэсгийг Сангийн сайд Б.Жавхлан ахалж байгаа бөгөөд Аж үйлдвэр, эрдэс баялгийн сайд Ц.Туваан, Зам, тээврийн сайд Б.Дэлгэрсайхан тэргүүлэн төр засгийн холбогдох албаныхан том, том техник нүргэлэх ажлын талбарт очсон юм.

Шивээхүрэн боомтын хувьд гуравдугаар сарын 20-ны байдлаар 3.7 сая тонн нүүрс экспортолжээ. 

Шивээхүрэн боомтоор нүүрс экспортын хэмжээ өнгөрсөн оны мөн үеийн гүйцэтгэлээс /5 хувь/ буурсан. Цаашид ч бодитой өсөлт гарах магадлал бага байна гэж компаниуд үзэж байна. Нарийнсухайтын бүлэг орд дээр үйл ажиллагаа явуулж байгаа аж ахуйн нэгжүүдийн нийт олборлолтын хүчин чадал жилд 51 сая тонн бөгөөд өнгөрсөн онд 24 сая тонн нүүрс экспортолжээ. Харин 2023 онд 19 сая тонн нүүрс экспортолж, нийт экспортын 27 хувийг бүрдүүлсэн байна.

Шивээхүрэн боомтын зөвлөлөөс энэ жилийн хувьд өнгөрсөн жилийн нүүрсний экспортын биет хэмжээг бууруулахгүй хадгалах, улмаар 26 тонн руу хүргэхээр төлөвлөж байна. Шивээхүрэн боомт 4.4 сая тонн хүчин чадалтай 22 нүүрс ачиж, буулгах агуулахтай, тус агуулахад 2.6 сая тонн нүүрсний үлдэгдэлтэй байна.

Шивээхүрэн боомтын зөвлөлөөс нүүрсний экспортыг нэмэгдүүлэх зорилгоор нүүрсний тээврийн хэрэгслийн тоог өдөр бүр 800-аас доошгүй нэвтрүүлэх, өдрийн амралтгүй ажиллахаар Сэхэ боомтын талтай тохиролцох яриа хэлэлцээг эхлүүлжээ.