Нүүрсний зах зээлд амаргүй өдрүүд үргэлжилж байна. Амаргүй байгаа шалтгаан нь манай улсын нүүрсний гол худалдан авагч болох БНХАУ нүүрсний хэрэглээгээ багасгах болсон явдал юм. Үүнтэй холбоотойгоор нүүрсний борлуулалт багасаж, үнэ төрлөөсөө хамаарч 40 хүртэлх хувиар буурсан. Энэ нь манай улсын эдийн засагт сөргөөр нөлөөлж, валютын нөөц багасах, төсвийн орлого тасрах эрсдэлийг бий болгож байгаа. Монгол Улсын хэмжээнд энэ жил нийт 83 сая тонн нүүрс экспортлох, үүний 30 сая тонныг "Эрдэнэс Тавантолгой" ХК олборлож, борлуулах байгаа. Биет хэмжээгээ нэлээд өөдрөг төсөвт тооцсон.
Хэдийгээр Хятад улс түүхий нүүрсний хэрэглээгээ багасгасан боловч Баяжуулсан буюу өндөр чанартай нүүрсний хэрэглээгээ бууруулаагүй. Энэ нь дотоодын нүүрс баяжуулах үйлдвэрүүдэд үйл ажиллагаагаа хэвийн үргэлжлүүлэх, үйлдвэрлэлийн хэмжээгээ өсгөх боломж олгож байна. Эндээс харахад, баяжуулах үйлдвэрүүд нэлээд завгүй ажиллахаар байгаа юм.
"Эрдэнэс Тавантолгой" ХК-ийн хувьд нүүрс баяжуулах үйлдвэрээ өнгөрсөн онд барьж ашиглалтад оруулсан. Хэрэв баяжуулсан нүүрсний эрэлт хэрэгцээ буурсан бол тус компани томоохон хүндрэлд орох байсан. Харин үнийн огцом уналт баяжуулсан нүүрснээс холуур өнгөрч байна. Энэ байдал "Эрдэнэс Тавантолгой" ХК нүүрсний зах зээлд гол тоглогч байх боломж, нөхцөлийг хангахаар байна. Учир нь баяжуулсан нүүрсний эрэлт их байгаа энэ үед түүхий нүүрсээ баяжмал болгоод экспортлоод байвал нүүрсний зах зээлийн хямралд өртөхгүйгээр даван туулах, хамгийн гол нь төсөв, татварт төвлөрүүлэх орлого тасрахгүй байх боломж байгаа юм.
