Мэдээллийн уурхай Mining.mn сайтын сурвалжлах баг Өмнөговь аймгийн Гурвантэс сумын нутаг дахь Шивээхүрэнгийн боомтод томилолтоор ажиллаж байна. Тус боомтоор Нарийнсухайтын бүлэг ордыг түшиглэн үйл ажиллагаа явуулах гадаад, дотоодын хөрөнгө оруулалттай 8 аж ахуйн нэгж нүүрс экспортолж байна.
Шивээхүрэн боомтын хувьд манай нүүрсний экспортын голлох боомтуудын нэг бөгөөд 2023 онд тус боомтоор 19 сая тонн, 2024 онд 24 сая тонн нүүрс экспортолжээ. Харин энэ оны хувьд экспортын хэмжээг 25 сая тоннд хүргэхээр төлөвлөжээ.
2025 оны гуравдугаар сарын 20-ны өдрийн байдлаар нийт 3.8 сая тонн нүүрс экспортолсон байна. Энэ нь 2024 оны мөн үетэй харьцуулахад 5 хувиар буурсан үзүүлэлт аж.
Сүүлийн гурав хоногийн хугацаанд сүлжээний доголдол үүсэж, нүүрс тээврийн замд урт дараалал үүссэн байна. Хэрэв сүлжээний доголдол үүсээгүй байсан бол 3 дугаар сарын 31 гэхэд нүүрсний экспортын хэмжээ 5 сая тонн руу хүрэх боломжтой байсныг Шивээхүрэн боомтын захиргаанаас хэллээ.
Шивээхүрэн боомтын үйл ажиллагаатай Аж үйлдвэр, эрдэс баялгийн сайд Ц.Туваан тэргүүтэй Засгийн газрын сайд нар танилцаж, цаашид авах арга хэмжээ, тулгамдсан асуудлыг газар дээр нь шийдвэрлэх, Засгийн газрын хуралдаанд танилцуулахаар боллоо.
Гадаад зах зээлээс шалтгаалан нүүрсний үнэ 40 хувиар унасан, уулын ажлын нөхцөл хүндэрч, өртөг зардал нэмэгдэж байхад АМНАТ тооцох жишиг үнэ буурахгүй байна. АМНАТ тооцох жишиг үнэ нь гэрээний үнээс 2-2.7 дахин өндөр байгаа бөгөөд 11-14 хувийн АМНАТ төлж байгааг нүүрс экспортлогч аж ахуйн нэгжүүд хэллээ.
Нарийнсухайтын бүлэг ордод 2008 оноос хойш 17 жилийн хугацаанд аж ахуй нэгжүүд идэвхтэй үйл ажиллагаа явуулж эхэлсэн бөгөөд өдгөө уурхай 150-250 метр хүртэл гүнзгийрч, хөрс хуулалтын хэмжээ өссөн, уул геологийн нөхцөл хүндэрсэн зэргээс шалтгаалан нүүрсний өртөг жил бүр нэмэгдэх болжээ.
