Ерөнхий сайд Н.Учрал Дорноговь аймгийн Алтанширээ сумын нутагт баригдаж буй Газрын тос боловсруулах үйлдвэрийн барилга, бүтээн байгуулалтын явцтай танилцаж байна.
Монгол Улсад баригдаж буй Газрын тос боловсруулах үйлдвэрийн гадаадад үйлдвэрлэгдэж буй техник, тоног төхөөрөмж, багц байгууламжууд үйлдвэрийн талбайд ээлж дараалан бууж, механик угсралтын ажил эрчимтэй явагдаж байна.
Үйлдвэрийн эх байгууламжуудын нэг болох Вакуум нэрлэгийн цамхагийг бүтээн байгуулалтын талбайд хүлээн аваад удаагүй байгаа. Тус үйлдвэрийг 2028 онд ашиглалтад оруулахаар төлөвлөж, бүтээн байгуулалт үргэлжилж буй.
Газрын тос боловсруулах үйлдвэр нь Монгол Улсын Засгийн газар, БНЭУ-ын Засгийн газрын хооронд байгуулсан 1.7 тэрбум ам.долларын Зээлийн ерөнхий хэлэлцээрийн хүрээнд хэрэгжиж байна.
Үйлдвэр жилд 1.5 сая тонн түүхий тос боловсруулж, 824 мян.тн дизель, АИ95 бензин 396 мян.тн, онгоцны түлш 80 мян.тн, зуухны түлш 17 мян.тн, шингэрүүлсэн шатдаг хий 27 мян.тн үйлдвэрлэх юм.
Үйлдвэр ашиглалтад орсноор, Монгол Улс газрын тосны хэрэгцээний 55 орчим хувиа дотооддоо хангана.
Үйлдвэрийн гадна талбайн болон дотоод дэд бүтцийн ажил дууссан. 550 ажилтны орон сууцны бүтээн байгуулалтын эхний шат дууссан. 135 айлын орон сууц болон оффис-үйлчилгээний төв ашиглалтад орсон. Харин 35МВт ДЦС, 5МВт “Ширээт” дэд станцын санхүүжилтийг Засгийн газар шийдвэрлэснээр ажил эхэлсэн. Үйлдвэрийн төсөл бүрэн дууссанаар 850-900 ажлын байр шинээр бий болох юм.
