Ерөнхийлөгч У.Хүрэлсүх Оюу толгойн гүний уурхайн бүтээн байгуулалттай танилцлаа. Түүний хувьд Шадар сайд байхдаа Оюу толгойн уурхайд зочилж байсан удаатай. Харин энэ удаагийн орон нутаг дахь томилолт ихээхэн онцлог байлаа. Учир нь газрын гүнээс 1300 метрийн гүн дэх зэс, алтны гүний уурхайтай танилцсан Монгол Улсын анхны Ерөнхийлөгч У.Хүрэлсүх болж байна. Монгол уурхайчдын ур чадвар, мэдлэг оюун шингэсэн гүний уурхайн бүтээн байгуулалтын гүйцэтгэл 90 гаруй хувьтай үргэлжилж буй.

"Оюу толгой" төслийн хувьд дотоодоос цахилгаан эрчим хүчээ авах, говийн усны ашиглалтыг улам сайжруулах, төслийн үр ашгийг нэмэгдүүлэх, орон нутгийн нийгэм, эдийн засгийн хөгжилд, тэр тусмаа Ханбогд сумын дунд хугацааны тогтвортой хөгжилд онцгой анхаарал хандуулах шаардлагатай байгаа юм.