Эдийн засгийн бодлого, өрсөлдөх чадварын судалгааны төвөөс 12 дахь жилдээ "Аймгуудын өрсөлдөх чадвар тайлан 2023"-г танилцууллаа. Аймгуудын өрсөлдөх чадварыг Эдийн засгийн тамир тэнхээ, Бизнесийн орчин, Засаглалын үр ашиг, Дэд бүтэц гэх үндсэн дөрвөн бүлгийн хүрээнд нийт 181 шалгуур үзүүлэлтээр үнэлж тооцдог.

Судалгааны зорилго нь Монгол Улсын 21 аймгийн өрсөлдөх чадвар, хөгжлийн түвшинг харьцуулан үнэлэх, өрсөлдөх чадварыг цогц байдлаар тодорхойлох, давуу, сул тал, өөрчлөлтийг хэмжихэд ордог. Судалгааны эх үүсвэр нь статистик мэдээлэл, 21 аймгийн бизнес эрхлэгчдээс авсан санал асуулгын мэдээллээс бүрддэг.

2023 оны "Аймгуудын өрсөлдөх чадварын тайлан"-г Орхон, Дорноговь, Дархан-Уул, Өмнөговь, Говьсүмбэр аймаг тэргүүлж, Говь-Алтай, Завхан, Дундговь дахин сүүл мушгив. Өрсөлдөх чадварыг хэмждэг үндсэн дөрвөн бүлгээр буюу Эдийн засгийн тамир тэнхээгээр Дорноговь аймаг, Бизнесийн үр ашгаар Дархан-Уул аймаг, Засаглалын үр ашиг болон Дэд бүтцээр Орхон аймаг нэгдүгээрт эрэмбэлэгдсэн байна.

Аймгуудын өрсөлдөх чадварын ерөнхий онооны дундаж 66.6 болж өнгөрсөн жилээс 1.6 оноогоор өслөө. Мөн бизнесийн үр ашиг үндсэн бүлэг 17 оноо, эдийн засгийн тамир тэнхээ үндсэн бүлэг 8 оноо, засаглалын үр ашиг үндсэн бүлэг 10 оноо, дэд бүтэц үндсэн бүлэг 4 оноогоор тус тус өсөв.

Аймаг тус бүрээр нь харвал 21 аймгаас 12 аймгийн өрсөлдөх чадварын ерөнхий оноо өнгөрсөн жилээс өссөн бол 9 аймгийн оноо буурсан байна. Төв аймаг 13 оноо, Ховд аймаг 12 оноо, Баян-Өлгий аймаг 10 оноо, Дархан-Уул аймаг 9 оноогоор өссөн нь өрсөлдөх чадварын ерөнхий оноогоо хамгийн ихээр ахиулсан үзүүлэлт юм. Говь-Алтай аймаг 12 оноо, Завхан аймаг 9 оноогоор буурсан нь өрсөлдөх чадварын ерөнхий оноо хамгийн ихээр буурсан үзүүлэлт юм.

Энэ жилийн онцлох үр дүнгээс дурдвал:

• Орхон аймаг  засаглалын үр ашиг, дэд бүтэц бүлгийн үнэлгээгээр 1-рт эрэмбэлэгдэж, өрсөлдөх чадварын ерөнхий үнэлгээгээр тэргүүлсэн. 
• Дорноговь аймгийн ерөнхий үнэлгээ 1 эрэмбээр ухарч 2-рт эрэмбэлэгдсэн. Эдийн засгийн тамир тэнхээ үндсэн бүлэгт 1-рт эрэмбэлэгдсэн.
• Дархан-Уул аймаг ерөнхий үнэлгээгээр 3-рт эрэмбэлэгдэж өмнөх оны эрэмбэд өөрчлөлт гараагүй ч, өрсөлдөх чадварын ерөнхий оноо 9-өөр өссөн. Үүнд институцийн тогтолцоо, бизнесийн эрхзүй, боловсрол, соёлын үзүүлэлтүүд сайжирсан нь нөлөөлжээ.
• Өрсөлдөх чадварын ерөнхий үнэлгээгээр 4-рт эрэмбэлэгдсэн Өмнөговь аймаг эрэмбийн хувьд өөрчлөлтгүй ч, өрсөлдөх чадварын ерөнхий оноо 3.5-аар буурсан. Үүнд институцийн тогтолцооны үзүүлэлтүүд суларсан нь хамгийн голлох нөлөөг үзүүлжээ.
• Төв, Ховд, Баян-Өлгий, Дархан-Уул аймгууд өрсөлдөх чадварын ерөнхий оноогоо хамгийн ихээр ахиулсан бөгөөд, эдийн засгийн тамир тэнхээ, засаглалын үр ашиг, бизнесийн үр ашиг үндсэн бүлгүүдийн оноо өссөн нь нийтлэг байна.
• Өмнөх оны үр дүнтэй харьцуулахад Говь-Алтай, Завхан аймгуудын өрсөлдөх чадварын ерөнхий оноо хамгийн их буурсан байна. Говь-Алтай аймгийн засаглалын үзүүлэлтүүд, Завхан аймгийн эдийн засаг, санхүүгийн үзүүлэлтүүд буурсан нь өрсөлдөх чадварын оноо буурахад түлхүү нөлөөлжээ.
• 21 аймгаас Дундговь [21], Завхан [20], Говь-Алтай [19] аймгууд сүүлд эрэмбэлэгдлээ. Эдгээр 3 аймаг Бизнесийн үр ашиг үндсэн бүлгийн хувьд сул байгаа нь нийтлэг байна.