Банк бус санхүүгийн үйл ажиллагаа эрхлэх тусгай зөвшөөрлийг 3 компанид олгов
Санхүүгийн зохицуулах хорооны ээлжит 19 дүгээр хуралдаан өнөөдөр болж, хуулийн этгээдээр бүртгэх, үнэт цаасны бүртгэлд өөрчлөлт оруулах, тусгай зөвшөөрөл олгох, хүчингүй болгох болон бүртгэлийн өөрчлөлт хийх зэрэг нийт 26 асуудал хэлэлцлээ.
Хуралдаанаар 2 компанийн хөрөнгөөр баталгаажсан үнэт цаас болон олон нийтэд санал болгон гаргаж буй бондыг тус тус бүртгэхээр боллоо. Мөн 1 компанийг үнэт цаасны зах зээлд оролцогчид хууль зүйн зөвлөгөө үзүүлэх хуулийн этгээдээр бүртгэхээр, хамтын хөрөнгө оруулалтын сангийн үйл ажиллагаа эрхлэх болон үнэт цаасны итгэмжлэн удирдах үйл ажиллагаа эрхлэх тусгай зөвшөөрлийг тус тус 1 компанид олгохоор шийдвэрлэв.
Түүнчлэн ердийн даатгалын үйлчилгээ эрхлэх тусгай зөвшөөрлийг 1 компанид, банк бус санхүүгийн үйл ажиллагаа эрхлэх тусгай зөвшөөрлийг 3 компанид, хадгаламж, зээлийн үйл ажиллагаа эрхлэх тусгай зөвшөөрлийг 1 хадгаламж, зээлийн хоршоонд, үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрлийг 1 компанид олгохоор боллоо.
Харин 5 компанийн үйл ажиллагаа эрхлэх тусгай зөвшөөрлийг хүчингүй болгож, 2 хадгаламж, зээлийн хоршооны үйл ажиллагаа эрхлэх тусгай зөвшөөрлийг түдгэлзэж, 1 компанийн энгийн хувьцааг нийтэд санал болгохыг зөвшөөрсөн үнэт цаасны бүртгэлээс хасахаар, 1 компанийн хувь нийлүүлсэн хөрөнгийн хэмжээ, хувьцаа эзэмшигчийн бүтэц, бүрэлдэхүүнд өөрчлөлт оруулахаар тус тус шийдвэрлэсэн юм
