"Оюу толгой" төслийн гүний уурхайн бүтээн байгуулалт өндөрлөх тун дөхөж байна. Тус компанийн гүнийн уурхайн олборлолт нэмэгдэх, үйл ажиллагаа нь жигдрэх 2028-2036 онд жилд дунджаар 500,000 тонн зэс олборлох төлөвтэй байгаа. Ингэснээр дэлхийн дөрөв дэх томоохон зэсийн үйлдвэрлэгч болно гэж үзэж буй.

Өндөр агуулга бүхий зэс, алтны Оюутолгой ордоос Монгол Улс өөрийн эзэмших 34 хувьдаа ногдол ашиг хүлээсээр байгаа. Ногдол ашиг хуваарилах эсэх нь цаг хугацааны хувьд улам л хойшилсоор ирсэн. Төслийн үр ашгийг нэмэгдүүлэх, хувьцаа эзэмшигчдийн эрх ашгийг хамгаалах, ажилчдын амьдрах орчин нөхцөлийг сайжруулах, зэс хайлуулах үйлдвэр барих, эрчим хүчээ дотоодоос авах зэрэг асуудал байнга хөндөгдөж байгаа.

Тэгвэл "Оюу толгой" төслийн үйл ажиллагаатай Монгол Улсын Ерөнхийлөгч У.Хүрэлсүх өнөөдөр танилцах бөгөөд гүний уурхайн бүтээн байгуулалтын явцын талаар газар дээрээс нь мэдээлэл авах аж. Хөрөнгө оруулалтын орчинд томоохон эерэг сурталчилгаа болж ирсэн "Оюутолгой" нь эдийн засаг ирэх жилүүдэд өсөлттэй байх нэг гол тулгуур юм.