Зэсийн баяжмал хайлуулах, боловсруулах үйлдвэрийн стратегийн хөрөнгө оруулагчаар БНХАУ-ын NFC компанийг сонгожээ

15 Цагийн өмнө

215

Зэсийн баяжмал хайлуулах, боловсруулах үйлдвэрийн стратегийн хөрөнгө оруулагчаар БНХАУ-ын NFC компанийг сонгожээ

Төсөлд хөрөнгө оруулж, хамтран ажиллах сонирхолтой 20 гаруй улсын 55 компанид мэдээлэл хүргүүлснээс долоон улсын 13 компани санал ирүүлсэн.

Монгол Улс зэсийн баяжмалаа түүхийгээр экспортлох бус, дотооддоо боловсруулж, нэмүү өртөг шингэсэн эцсийн бүтээгдэхүүн үйлдвэрлэх, эдийн засгаа төрөлжүүлэх зорилтын хүрээнд уг төслийг үйлдвэрлэл, технологийн паркийн хэлбэрээр хэрэгжүүлж буй.

Үйлдвэр ашиглалтад орсноор жилд 560 мянган тонн зэсийн баяжмал боловсруулж, 124 мянган тонн катодын зэс үйлдвэрлэхээр төлөвлөжээ.

Төслийн техник, эдийн засгийн үндэслэл, байгаль орчинд нөлөөлөх байдлын нарийвчилсан үнэлгээ болон технологийн холбогдох баримт бичгүүд батлагдсан.

Үйлдвэрлэл, технологийн паркийн дэд бүтцэд 68 сая ам.долларын санхүүжилт хийж, эхний ээлжийг ашиглалтад хүлээн авсан, 2027 онд бүрэн дуусгахаар ажиллаж байна.

Үе шаттай сонгон шалгаруулалтын үр дүнд БНХАУ-ын NFC компанийг стратегийн хөрөнгө оруулагчаар сонгож, хөрөнгө оруулагчтай санхүүжилт, хувьцаа эзэмшил, барилга угсралтын гэрээний хэлэлцээ үргэлжилж байна.

Аж үйлдвэр, эрдэс баялгийн сайд Г.Дамдинням "Эрдэнэтийн зэс хайлуулах үйлдвэрийн олон улсын нээлттэй тендерт гүйцэтгэгч компани шалгарсан. Ерөнхий сайдын үүрэг даалгаврын дагуу хөрөнгө оруулалтын гэрээ байгуулах ажлыг 11 дүгээр сардаа багтаан дуусгана. Ингээд ирэх оны бүтээн байгуулалтын улиралд барилгын ажил эхэлнэ" гэв.

Монгол Улсын Ерөнхий сайд Н.Учрал “Эрдэнэт үйлдвэр” ТӨҮГ-ыг түшиглэн байгуулах 772 сая ам.долларын өртөгтэй зэсийн баяжмал хайлуулах, боловсруулах үйлдвэрийн төслийн хэрэгжилтийн явцыг шалгаж, бүтээн байгуулалтыг эрчимжүүлж, гэрээ, хэлэлцээг ирэх арваннэгдүгээр сард багтааж дуусгахыг үүрэг болголоо.

Сэтгэгдэл

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд бид хариуцлага хүлээхгүй.