АҮЭБ-ийн сайд Г.Дамдинням ОХУ-ыг өчигдөр зорьсон. Түүний албан томилолт шатахууны нийлүүлэлтийг нэмэгдүүлэх яриа хэлэлцээг эрчимжүүлэх Ерөнхий сайдаас өгсөн үүрэг даалгавартай. Тэгвэл ОХУ-д хийж буй албан томилолтоо дуусгаад БНХАУ-д үргэлжлүүлэн ажиллахаар байна. Салбар хариуцсан сайдын БНХАУ-д хийх албан томилолтыг үр дүнтэй болоход бүх талаар дэмжин ажиллана гэдгээ БНХАУ-ын төрийн өмчит Хятадын Үндэсний газрын тосны корпорацийн харьяа "Петрочайна Дачин Тамсаг" ХХК-ийн Ерөнхий захирал Жан Гуан Ян Ерөнхий сайд Н.Учралтай уулзах үеэр онцолсон.

БНХАУ-аас энэ оны наймдугаар сард 6000 тонн АИ-92 автобензинийг манай улсад нийлүүлэхээр болсон. Цаашид нийлүүлэлтийн хэмжээг сар бүр 12-15 мянган тоннд хүргэж, тогтвортой байлгах хүсэлтийг Монгол Улсын Засгийн газрын тэргүүн тавиад байгаа юм.