Монголын эдийн засгийн чуулганыг уламжлал ёсоор Ерөнхий сайд /2025.07.08/ нээж, шинээр бүрдсэн Засгийн газар ирэх цаг хугацаанд хэрхэн ажиллах, ямар бодлого, чиглэлээ баримтлах эсэхээ хувийн хэвшил, хөрөнгө оруулагчдад дэлгэрэнгүй танилцууллаа. Уул уурхайн экспорт суурилсан манай улсын эдийн засаг, төсөв орлогын хувьд ихээхэн эмзэг бүтэцтэй. Энэ байдал нь эдийн засгийн өсөлт тогтворгүй, гадаад зах зээлийн үнийн нөлөө орж ирдэг гээд тоочих бэрхшээл их.

Хэдий ийм боловч Засгийн газар хэрхэн эдийн засаг, бизнесийн орчныг харах, төлөвлөх, оновчтой, үр дүнтэй бодлого хэрэгжүүлэхээс улс орны хувь заяа шууд хамаарна. Тиймээс шинэ засаг төрөөс хүлээх хүлээлт нийгэм, эдийн засаг, бизнесийн орчинд өндөр байна. 

Эдийн засгийн чуулганд гадаад, дотоодын нийт 3000 гаруй хөрөнгө оруулагч, бизнес эрхлэгч, бодлого боловсруулагч, олон улсын байгууллагын төлөөлөл оролцож байна. Ерөнхий сайд Г.Занданшатар форумыг нээж хэлсэн үгэндээ эдийн засаг, хөгжлийн бодлого, хөрөнгө оруулалт, бизнесийн орчныг хэрхэн сайжруулах талаар түлхүү онцолсон.

“Бид хөрөнгө оруулагчаа урьчихаад урдаггүй, залчихаад заамддаггүй улс орон байх ёстой. Хөрөнгө оруулагчдад ээлтэй улс гэж бид өөрсдийгөө биш, хөрөнгө оруулагчид хэлдэг болсон тэр цагт бизнесийн эрүүл орчин биежин бүрдэнэ” гэж тодотгосон нь нөхцөл байдлаа бодитоор харж, хөрөнгө оруулагчдыг үргээх бус харин хамтдаа маргаашийг бүтээх хүсэл, зорилго тээж байгааг илтгэлээ. Манай улс уул уурхайгаас гадна хөдөө аж ахуй, сэргээгдэх эрчим хүч, аялал жуулчлалыг хөгжүүлэхэд онцлон анхаарч, цахим үндэстэн болохыг зорьж байгааг Тэргүүн шадар сайд бөгөөд Эдийн засаг, хөгжлийн сайд Н.Учрал онцолсон юм.