Зах зээлээс шалтгаалан нүүрсний үнэ 40 хувиар унасан, уулын ажлын нөхцөл хүндэрсэн, тээврийн зай уртсан нүүрс олборлох, тээвэрлэх өртөг жил бүр өссөн дүр зураг Нарийнсухайтын уурхайд угтлаа. Ашигт малтмалын нөөц ашигласны төлбөр /АМНАТ/ тооцох жишиг үнэ нь гэрээний үнээс 2-2.7 дахин өндөр байгаа бөгөөд 11-14 хувийг АМНАТ-т төлж байгаа аж.

Одоогоор уурхайн компаниуд эрчим хүчний нэг тонн нүүрс тутамд 5-10 ам.долларын алдагдалтай ажиллаж байна. Тиймээс нүүрсний АМНАТ-ийг тухайн /Шивээхүрэн, Гашуунсухайт/ боомтоор экспортолсон ижил чанарын нүүрсний хамгийн өндөр гэрээний үнийг баримтлан тооцож, ногдуулах хүсэлтийг Нарийнсухайтын бүлэг ордод үйл ажиллагаа явуулж байгаа аж ахуйн нэгжүүд Засгийн газарт тавьж байна.