С.Жавхланбаатар: Алт-3 аяны журмын төслийг боловсруулахаар оролцогч талуудаас санал авч байгаа
Голомт банк зургаа дахь удаагаа “Алтны форум-2025” арга хэмжээг өнөөдөр зохион байгууллаа. “Алтны салбарын ирээдүйн төлөв” хэлэлцүүлэгт Аж үйлдвэр, эрдэс баялгийн Төрийн нарийн бичгийн дарга Жавхланбаатар оролцож, Засгийн газраас хэрэгжүүлэхээр төлөвлөж буй "Алт-3" аяны талаар ерөнхий мэдээлэл өглөө. Өмнө нь алтны салбарт хоёр удаа хөтөлбөр хэрэгжүүлж байсан бол энэ удаа аян гэдгийг салбарын Төрийн нарийн бичгийн дарга тодотголоо. "Алт-3" аяны журмын төслийг ирэх 7 хоногт Засгийн газрын хуралдаанд танилцуулах бөгөөд холбогдох яамдаас санал авч байгаа гэв.
Алтны форумд Монгол Улсад үйл ажиллагаа явуулж буй алтны олборлогч аж ахуйн нэгжүүд, төсөл хөгжүүлэгчид, хөрөнгө оруулагчид, уул уурхайн машин механизм, тоног төхөөрөмж үйлдвэрлэгч, нийлүүлэгч байгууллагууд оролцож, өөрсдийн бүтээгдэхүүн үйлчилгээгээ танилцуулсан юм.
“Алтны форум”-аар уул уурхайн салбар дахь банкны оролцоо, макро эдийн засгийн орчин, геополитикийн нөхцөл байдал алтны зах зээл, дотоодын алтны худалдан авалт, цаашдын чиг хандлага зэрэг сэдвээр илтгэл хэлэлцүүллээ.
