Уул уурхайн 7 хоног нэгдсэн арга хэмжээ үргэлжилж байна. Хамтарсан Засгийн газар ирэх 4 жилийн хугацаанд хэрэгжүүлэх 14 мега төслөө танилцуулж, өргөн хэлэлцүүлэг өрнүүлсэн тус арга хэмжээнд "Эрдэнэс Оюу Толгой" компани өөрийн хариуцан хэрэгжүүлж буй "Хэрлэн Тооно" төслийн явцыг танилцуулж, аж үйлдвэрийн салбар тогтвортой хөгжих гарц, боломжийг тодорхойлсон юм. Ус байхгүй бол аж үйлдвэр хөгжиж, нийгэм, эдийн засгийн тогтвортой хөгжил яригдах боломжгүй. Тиймээс говийн бүс дагасан томоохон төслүүдийг хэрэгжүүлэхэд "Хэрлэн Тооно" төслийн хүлээх хариуцлага, гүйцэтгэх үүрэг нэн чухал юм.

"Хэрлэн Тооно" төслийн зөвлөх Ш.Мягмар "Хэрлэн тооно" төслийг хэрэгжүүлснээр бид үйлдвэр, уурхай, станцуудаа усаар хангах боломж бүрдэнэ. Мөн цаашлаад говийн бүсийн усыг нөхөн сэргээх боломжтой болно. Ингэснээр газрын доорх болон гадаргын усаа хосолсон байдлаар ашиглаж, улс орны эдийн засаг, нийгэмд маш үнэтэй хувь нэмэр оруулна гэж тооцож байгаа" гэв.