Байгаль орчин, аялал жуулчлал яамнаас сар бүр хийдэг ээлжит хэвлэлийн бага хурлыг өнөөдөр зохион байгууллаа. Энэ үеэр "Бүх нийтээр мод тарих үндэсний өдөр"-ийн хүрээнд нийслэлийн хэмжээнд төвлөрсөн 8 байршилд мод тарих үйл ажиллагааг 2024 оны 5 дугаар сарын 11-18-ний өдрүүдэд зохион байгуулахаар төлөвлөж байгааг онцлов. Энэхүү арга хэмжээнд Улаанбаатар хотод үйл ажиллагаагаа явуулдаг 310 орчим байгууллагын ажилтан албан хаагч хамрагдах аж.

“Бүх нийтээр мод тарих үндэсний өдөр”, “Тэрбум мод үндэсний хөдөлгөөн”-ий хүрээнд төвлөрсөн байршилд 2021 оны намрын улирлаас эхлэн таригдсан моддын өвөлжилтийн дараах тооллого, амьдралын хувийг тогтоох, нөхөн тарилтыг зохион байгуулах, тарьсан моддын усалгаа, арчилгааг тарьсан байгууллага, аж ахуйн нэгж, иргэдийг оролцуулан гүйцэтгэх ажлыг 2024 онд зохион байгуулахаар төлөвлөж байна.

Засгийн газрын үйл ажиллагааны хөтөлбөрт тусгагдсан ойгоор бүрхэгдсэн талбайн хэмжээг 8.6 хувьд хүргэнэ. Үүний хүрээнд дараах ажлыг хийхээр байна. 

➢ Зориудаар ойжуулах, байгалийн сэргэн ургалтыг дэмжих замаар доройтсон ойг ойн нөхөн сэргээх, гол нууруудын татмыг ойжуулах ажлыг 2.4 мян.га талбайд явуулж 4 сая мод тарина;

➢ Цөлжилтийг сааруулах хамгаалалтын ойн зурвас, агро ойн аж ахуйг 4 байршилд 130 га талбайд байгуулна;

➢ Мод үржүүлгийн газруудын хүчин чадлыг нэмэгдүүлэх, тарьц суулгацын нөөц бүрдүүлэх ажлын хүрээнд техник тоног төхөөрөмжийн дэмжлэг үзүүлнэ;

➢ Хөвсгөл, Завхан, Дорнод аймгуудын ойн санг бүртгэх, ой зохион байгуулалтын ажлыг 5 сая га  талбайд зохион байгуулна;

➢ Ойн арчилгаа, цэвэрлэгээний арга хэмжээг 1.3 мян.га талбайд зохион байгуулна;

➢ Ойн санг хамгаалах, ойн хөнөөлт шавжтай тэмцэх арга хэмжээг 330 мян.га талбайд зохион байгуулан 1.2 тэрбум модыг доройтолд өртөхөөс хамгаална;

➢ Ой, хээрийн түймрээс урьдчилан сэргийлэх арга хэмжээний хүрээнд 400 км түймрийн зурвасыг шинээр байгуулах, 235 км зурвасыг арчлах ажлыг зохион байгуулна.