С.Бямбацогт: Засгийн газар Оюу толгойгоос Монгол Улсын хүртэх өгөөжийг нэмэгдүүлэхэд анхаарч ажиллана
ЗГХЭГ-ын дарга С.Бямбацогт “Оюу толгой” ХХК-ийн гүйцэтгэх захирал Дэйрдрэ Лингенфэлдертэй өнөөдөр уулзлаа. Уулзалтын эхэнд "Оюутолгой ордоос Монголын ард түмэнд оногдох өгөөжийг нэмэгдүүлэх, зээлийн хүүг бууруулах, Онтре-гийн асуудлыг харилцан ашигтай байдлаар шийдвэрлэх чиглэлээр баримталж ирсэн Монгол Улсын Засгийн газрын байр суурь хэвээрээ байгаа" гэдгийг ЗГХЭГ-ын дарга С.Бямбацогт онцлоод, гэрээг илүү сайжруулан тодотгох, Онтре болон татвар, зээлийн хүүтэй холбоотой зайлшгүй шийдвэрлэх шаардлагатай асуудал дээр ойрын үед нэгдсэн шийдэлд хүрэхээр холбогдох ажлын хэсгүүд ажиллаж байгааг дурдлаа.
Тухайлбал:
-Оюутолгойн бүлэг ордын талбайн хил зааг дотор оршдог “Шивээ толгой”, “Жавхлант” нэртэй ашигт малтмалын ашиглалтын тусгай зөвшөөрөл эзэмшдэг “Онтре” компанитай төрийн эзэмшлийн хувь, хэмжээг тогтоох, хөрөнгө оруулагч талтай хэлэлцээ хийх чиг үүрэг бүхий Ажлын хэсгийг Аж үйлдвэр, эрдэс баялгийн сайд Г.ДАМДИННЯМ,
-Оюу толгой төслийн санхүүжилтийн хүүгийн зохистой байдлыг хянан үзэх, өөрчлөх асуудлаар хөрөнгө оруулагч талтай хэлэлцээ хийж, санал боловсруулах үүрэг бүхий Ажлын хэсгийг Сангийн сайд Б.ЖАВХЛАН,
-Лондонгийн олон улсын арбитрын шүүхэд үүссэн маргаанд Монгол Улсын эрх ашгийг хангуулах, Засгийн газрын байр суурийг хамгаалах үүрэг бүхий Ажлын хэсгийг Хууль зүй, дотоод хэргийн сайд Л.МӨНХБААТАР нар ахлан ажиллаж байгааг дуулгалаа.
Уулзалтын үеэр Монгол Улсын Засгийн газраас хэрэгжүүлэх мега төслүүдийн эхэнд эрэмбэлэгдэж буй зэс хайлуулах, алт цэвэршүүлэх үйлдвэрүүд байгуулахад "Оюу Толгой" ХХК ямар оролцоотой байж болох талаар санал солилцсон байна. Үүнээс гадна Оюу толгойн уурхай өнөөг хүртэл хэрэгцээт эрчим хүчээ урд хөршөөс импортолж ирсэн. Тэгвэл Таван толгойн цахилгаан станц баригдвал 2028 оноос дотоодын эх үүсвэрээс эрчим хүчээ авах болон "Оюу Толгой" ХХК одооноос бага агуулгатай исэлдсэн хүдрийн овоолгоо ирээдүйд хэрхэн ашиглах талаар анхаарал хандуулах ёстойг ЗГХЭГ-ын дарга онцолжээ.
