Манай улсад 2024 онд үйлдвэрлэлийн осол, хурц хордлогод 809 хүн өртсөн нь өмнөх оноос хоёр дахин өссөн үзүүлэлт юм. Үйлдвэрлэлийн осол, мэргэжлээс шалтгаалах өвчний тохиолдол уул уурхайн салбарт өндөр байгаа бол, барилгын салбарт хүний амь нас эрсэдсэн тоо өндөр байна. Ажлын байрны эрүүл, аюулгүй орчныг сайжруулах, хууль, дүрэм, журмыг хэрэгжүүлэх үйл ажиллагааг идэвхжүүлэх үндсэн зорилготой "Хөдөлмөрийн аюулгүй байдал, эрүүл ахуйн аян"-ы нээлт маргааш буюу 4 дүгээр сарын 2-ны өдрийн 09.00 цагт МҮХАҮТ-д болох гэж байна.

Жил бүрийн 4 дүгээр сард улс орон даяар үйлдвэрлэлийн осол гэмтэл, мэргэжлээс шалтгаалсан өвчнөөс урьдчилан сэргийлэх зорилгоор Хөдөлмөрийн аюулгүй байдал, эрүүл мэндийн сарын аяныг өрнүүлж хэвшээд буй. Энэ жил Олон Улсын Хөдөлмөрийн байгууллагаас “Хөдөлмөрийн аюулгүй байдал, эрүүл мэндийн хөгжил: Хиймэл оюун ухааны хэрэглээ ба цахимжилт” уриаг дэвшүүлсэн билээ.