“Орано Майнинг” компанитай байгуулах Хөрөнгө оруулалтын гэрээнд нэгдүгээр сарын 17-нд Монгол Улсын Засгийн газар гарын үсэг зурахаар боллоо. Олон талын эрх ашиг хөндсөн, олон жил ч яригдсан, олон ч Засгийн газрын нүүр үзсэн Монгол, Францын хамтарсан ураны төсөл бүтээн байгуулалт руу шилжлээ. Энэ төслийг хариуцлагатай цаг үед толгойлж буй Францын иргэн Марк Мелеард гэж хэн бэ. Тэрээр гурван жилийн өмнө буюу 2022 онд "Бадрах Энержи" компанийн тав дахь Гүйцэтгэх захирлаар томилогдсон ирсэн билээ.

 

М.Мелеард нь дэлхийн ураны хамгийн том компани "Орано" группийн уурхайн үйл ажиллагааны төлөвлөлтийн зохицуулалт, үйлдвэрлэлийн менежментээр туршлага хуримтлуулсан. Монголд томилогдохоосоо өмнө жилд 20 мянган тонн манган үйлдвэрлэх хүчин чадалтай Моанда төмөрлөгийн цогцолборын захирлын албыг хашиж байсан.

 

Францын төрийн өмчит "Орано"-д 10 гаруй жил ажиллахдаа үйлдвэрийн менежерээс захирлын түвшинд дэвшсэн. "Орано" группийн Нигер дахь Коминак уурхай, Казахстанд Катко үйлдвэр, Парисын төв оффист "Арева Майнз" компанийн үйлдвэрлэлийн менежментийг удирдсан. Энэ хугацаандаа ил болон далд уурхайн аргаар ураны олборлолт, хүдэр боловсруулах үйлдвэрлэлийг нэмэгдүүлэх, уурхайн үйл ажиллагааны төлөвлөлтийн нарийн тооцооллын чиглэлээр түлхүү ажиллаж ирсэн.

 

Монголд томилогдон ирсээр олон жил дуншсан, олон ч сонгууль “үзсэн”, олон ч эрсдэл туулсан Монгол, Францын хамтарсан ураны төслийг хөдөлгөх түүхэн үүргийг Марк Мелеард Францын талаас хүлээв. Түүний хувьд томилогдож ирсэн хэрэг зоригоо бүтээх түүхэн мөч 2025 оны нэгдүгээр сарын 17-ны өдөр Хөрөнгө оруулалтын гэрээгээр баталгаажих юм.